Міжнародны дзень роднай мовы адзначаецца 21 лютага
21 лютага па ініцыятыве UNESCO ва ўсім свеце адзначаецца Міжнародны дзень роднай мовы.
Свята ўзнікла дзеля таго, каб папярэдзіць знікненне ўнікальных гаворак і захаваць моўную разнастайнасць, падтрымаць нацыянальныя культуры, а таксама забяспечыць права кожнага чалавека на карыстанне роднай мовай.
Дзень быў выбраны ў знак памяці падзей, якія адбыліся ў Даке (Бангладэш) 21 лютага 1952 года, калі ад куль паліцэйскіх загінулі студэнты, якія выйшлі на дэманстрацыю ў абарону сваёй роднай мовы бэнгалі, якую яны патрабавалі прызнаць адной з дзяржаўных моў краіны. Паводле ацэнак UNESCO, палова прыкладна з 6 тыс. моў свету могуць у бліжэйшы час страціць апошніх носьбітаў.
У Беларусі таксама адзначаецца дзень роднай мовы, арганізуюцца разнастайныя мерапрыемствы.
Ад песень матулі, ад калыскі ад самай,
Са мною ты крочыш заўжды па жыцці,
І ў хвіліны ліхія ты народ паднімала,
Не давала застацца ў цяжкім забыцці.
Ты ў працы і ў гульнях, за партай і дома,
На вяселлі шчыруеш, пад гармонік пяеш,
І ўсім людзям у свеце, мая мова знаёма,
Дабрыню і спагаду ты з сабою нясеш.
Колькі зведала болю, бяды і напасцяў,
Колькі жаху сцярпела, на сабе пранясла…
Ты гучыш у хвіліны бясконцага шчасця,
І тады, як ад цела душа адышла…
Ты сумуеш і плачаш, шкадуеш і любіш,
Будзіш раніцай ціха і хвалюешся днём.
Пройдзе ўсё у жыцці, але ты са мной будзеш,
Мая родная мова, ганаруся табой!
Надежда Верас. 2012
